MML Computer-Assisted Translation

Pantagruel (Le Quart Livre) - François Rabelais

Sylvia Huot

Nostre amy, respondit le marchant, mon voisin, de la toison de ces moutons seront faictz les fins draps de Rouen. Des boyaulx, on fera chordes de violons et harpes, lesquelles tant cherement on vendra comme si feussent chordes de Munican ou Aquileie[1]. Que pensez vous?

- S'il vous plaist, dist Panurge, m'en vendrez un. Voyez cy argent content[2]. Combien?

- Mon amy, respondit le marchant, nostre voisin, ce n'est viande que pour Roys et Princes. La chair en est tant delicate, tant savoureuse, et tant friande que c'est basme. Je les ameine d'un pays on quel[3] les pourceaulx (Dieu soit avecques nous!) ne mangent que myrobalans[4]. Les truyes en leur gesine[5] (saulve l'honneur de toute la compaignie!) ne sont nourriez[6] que de fleurs d'orangiers.

- Mais, dist Panurge, vendez m'en un, et je vous le payeray en Roy, foy de pieton[7]. Combien?

- Nostre amy, respondit le marchant, mon voisin, ce sont moutons extraictz de la propre race de celluy qui porta Phrixus et Hellé par la mer dicte Hellesponte[8]. A propous. Par tous les champs es quelz ils pissent, le bled y provient comme si Dieu y eust pissé. Il n'y faut autre marne ne fumier. Plus y a. De leur urine les Quintessentiaux[9] tirent le meilleur salpetre du monde. De leurs crottes (mais qu'il ne vous desplaise) les medicins de nos pays guerissent soixante et dix huict especes de maladies. Que pensez vous, nostre voisin, mon amy? Aussi me coustent ilz bon.

- Couste et vaille[10], respondit Panurge. Seulement vendez m'en un, le payant bien[11].

- Nostre amy, dist le marchant, mon voisin, considerez un peu les merveilles de nature consistans en ces animaulx que voyez, voire en un membre que estimeriez inutile. Prenez moy ces cornes là, et les concassez un peu avecques un pilon de fer, ou avecques un landier, ce m'est tout un. Puis les enterrez en veue du soleil la part[12] que vouldriez, et souvent les arrouzez. En peu de moys vous en voirez naistre les meilleurs asperges du monde